تراویح نہ پڑھی ، تو روزے کا حکم ؟

روزہ اور تراویح مستقل الگ الگ عبادات ہیں ، ان میں سے کسی ایک کی ادائیگی دوسرے پر موقوف نہیں ، لہذا اگر کسی نے روزہ رکھا اور تراویح ادا نہیں کی ، تو اُس کا روزہ ادا ہوجائے گا ، البتہ بلا عذر ایک بار بھی تراویح چھوڑنا اساءت (بری بات) ہے اور چھوڑنے کی عادت بنا لینا گناہ ہے۔

مراقی الفلاح میں ہے : ”وهی سنۃ الوقت لا سنۃ الصوم فی الأصح فما صار أهلا للصلاة فی آخر اليوم يسن له التراويح كالحائض إذا طهرت و المسافر و المريض الفطر“ ترجمہ : اصح قول کے مطابق تراویح وقت کی سنت ہے ، روزے کی سنت نہیں ، تو جو دن کے آخری حصے میں نماز کا اہل ہوا ، اُس کے لئے تراویح سنت ہے جیسا کہ حیض والی عورت جب پاک ہو جائے ، اسی طرح مسافر اور روزہ چھوڑنے والا مریض (بھی تراویح پڑھیں گے) ۔   (مراقی الفلاح، ص159، المكتبۃ العصريۃ، بیروت)

امامِ اہلسنت الشاہ امام احمد رضاخان علیہ رحمۃ الرحمن تراویح چھوڑنے کا حکم بیان کرتے ہوئے فرماتے ہیں : ” سید عالم صلی اللہ تعالی علیہ و سلم نے تین شب تراویح میں امامت فرما کر بخوفِ فرضیت ترک فرما دی ، تو اس وقت تک وہ سنت مؤکدہ نہ ہوئی تھی ، جب امیرالمؤمنین فاروق اعظم رضی اللہ تعالی عنہ نے اسے اِجرا (جاری) فرمایا اور عامہ صحابہ کرام رضی اللہ تعالی عنہم اس پر مجتمع ہوئے ، اس وقت سے وہ سنت مؤکدہ ہوئی ، نہ فقط فعلِ امیر المؤمنین سے ، بلکہ ارشاداتِ سید المرسلین صلی اللہ تعالی علیہ و سلم سے ۔۔۔۔ اب ان کا تارک ضرور تارکِ سنتِ مؤکدہ ہے اور ترک کا عادی فاسق و عاصی (گنہگار ہے) ۔   (فتاوی رضویہ، ج7، ص471، رضا فاؤنڈیشن، لاھور)