جمعہ کے دن فوت ہونے والا عذابِ قبر سے محفوظ؟

جی ہاں! اللہ تعالیٰ کی رحمت سے جمعہ کے دن یا شبِ جمعہ فوت ہونے والے مسلمان کو عذابِ قبر نہیں ہو  گا  کہ متعدد طرق  سے مختلف الفاظ کے ساتھ یہ  حدیث مبارک مروی ہے کہ نبی کریم صلی اللہ علیہ وسلم نے ارشاد فرمایا: جو مسلمان جمعہ یا شب جمعہ میں فوت ہو، اللہ عزوجل اسے فتنۂ قبرسے محفوظ رکھے گا۔                                                                                    (جامع ترمذی، حدیث نمبر : 1076) (مسند احمد ، حدیث نمبر : 7070) اس حدیث مبارکہ کے تحت محدثین کرام فرماتے ہیں، فتنہ قبر سے سوالات اور عذابِ قبر مراد ہے۔   (مرقاۃ المفاتیح، کتاب الصلوۃ، باب الجمعۃ، جلد 3، صفحہ 415، مطبوعہ کوئٹہ) نوٹ : اگر اس بارے میں منقول روایات من حیث الانفراد ضعیف بھی ہوں ، تب بھی ان سے استدلال درست ہے: (1) اولاً مجموعی طور پر تعددِ طرق کی وجہ ان کا مرتبہ ضعیف نہیں رہتا ، بلکہ حَسَن (لغیرہ) بن جاتا ہے ۔ (2) ثانیاً اس کا تعلق فضائل سے ہے اور باتفاقِ محدثین بابِ فضائل میں ضعیف حدیث بھی حجت ہوتی ہے ۔