کیا ”التحیات“معراج میں ہونے والا مکالمہ ہے؟

کئی کتابوں میں مستند علمائے کرام  نے یہ بات لکھی ہے کہ جب نبی کریم صلی اللہ علیہ و الہ و سلم کو سفرِ معراج کروایا گیا، تو حضور صلی اللہ علیہ و الہ وسلم نے کی حمد و ثنا کرتے ہوئے عرض کی : ”التحيات للہ والصلوات والطيبات“ پھر اللہ تعالیٰ نے ارشاد فرمایا : ”السلام عليك ايها النبي ورحمة الله وبركاته“   تو نبی کریم صلی اللہ علیہ و الہ وسلم نے عرض کی : ”السلام علينا وعلى عباد الله الصالحين“  اس کے بعد حضرتِ جبریل امین اور دیگر ملائکہ علیہم السلام نے توحید  ورسالت کی گواہی دیتے ہوئے کہا : ”اشهد ان لا اله الا الله واشهد ان محمدا عبده ورسوله“  اس کے چند حوالے مندرج ذیل ہیں ۔

( تفسیر روح البیان  ، ج 5 ،ص125،دار الفکر، بیروت)   (مرقاۃ المفاتیح للقاری،ج2،ص832،دار الفکر ، بیروت)   (شرح سنن ابی داؤدللعینی  ،ج 4،ص238  ، مکتبۃ الرشد ، الریاض )

ٍچونکہ معتبر و مستند علماء نے اسے نقل کیا ہے، لہٰذا ان پر اعتماد کرتے ہوئے اسے واقعہ معراج کے ضمن میں بیان کرنا بالکل درست ہے ۔ البتہ  یاد رہے کہ فقہائےکرام اورمحدثین عظام نے اس بات  کو بیان کیاہےکہ جب نمازی التحیات میں السلام  علیک ایھا النبی ورحمۃ اللہ وبرکاتہ پر پہنچے ، تو اس کی توجہ کا مرکزرحمت عالمصلی اللہ تعالیٰ علیہ و اٰلہ وسلم کی ذاتِ مقدسہ ہو نی چاہیے، محض  واقعہ معراج کے اس مکالمے کی  نقل و حکایت مقصود نہیں ہونی چاہیے۔

(احیاء العلوم ،ج1،ص202،مکتبۃ الصفا  )    (لمعات التنقیح ،ج3،ص45،مطبوعہ لاھور  )   (فتاویٰ رضویہ ،ج15،ص206،رضا فاونڈیشن  لاھور  )