سنتیں پڑھتے ہوئے جماعت کھڑی ہو جائے ، تو سنتوں کا حکم ؟

چار رکعتی سنتِ غیر مؤکدہ (مثلاً عصر یا عشاء کی سنتِ قبلیہ) پڑھ رہے ہوں اور جماعت کھڑی ہو جائے ، تو انہیں مکمل کرنے ، نہ کرنے کے متعلق تفصیل یہ ہے کہ اگر ابھی تیسری رکعت کے لئے کھڑے نہیں ہوئے ، تو دو رکعتوں پر سلام پھیر کر جماعت میں شامل ہو جائیں ، کیونکہ سنتِ غیر مؤکدہ نفل کے حکم میں ہوتی ہیں اور نفل میں ہر دو رکعتیں شفع (جداگانہ نماز) شمار کی جاتی ہیں ، البتہ اگر تیسری رکعت کے لئے کھڑے ہو گئے ، تو چاررکعتیں مکمل کرنی ہوں گی۔

اور اگر چار رکعتی سنتِ مؤکدہ (مثلاً ظہر اورجمعہ کی سنتِ قبلیہ) پڑھنے کے دوران جماعت کھڑی ہو گئی ، تو چاروں رکعتیں پوری کرنے ، نہ کرنے کے بارے میں فقہائے کرام کے دو اقوال ہیں۔

(1) اس میں بھی وہی تفصیل ہو گی ، جو سنتِ غیر مؤکدہ میں بیان کی گئی ۔

(2) ایک قول یہ ہے کہ تیسری رکعت کے لئے کھڑا ہوا یا نہیں ، بہر صورت چار رکعتیں مکمل کرنی ہوں گی۔

یہ دونوں اقوال قوی اور تصحیح شدہ ہیں ، لہٰذا جس قول پر بھی عمل کر لیا جائے شرعاً مؤاخذہ نہیں ہو گا ، لیکن زیادہ راجح دوسرا قول ہے اور اسی قول کی جانب مجدد اعظم امام اہلسنت الشاہ امام احمد رضا خان علیہ الرحمۃ کا میلان ہے۔

(ردالمحتار مع الدرالمختار ، ج 2 ، ص 611 تا 612 ، دارالفکر ، بیروت)
(فتاوی رضویہ ، ج 8 ، ص 129 تا 132 ، رضا فاؤنڈیشن ، لاھور)
(فتاوی رضویہ ، ج 8 ، ص 135 تا 136 ، رضا فاؤنڈیشن ، لاھور)